Act 4 | GAM | STEP | Pita ne Jon kandja dje una awo mopillka, opa gale awi una ne, Sadusi una ne, lotu numb kerman eine iwa kerman ta moi ge, porapora wo,

Acts 4

Una wo Pita ne Jon ipo kaye wori

1 Pita ne Jon kandja dje una awo mopillka, opa gale awi una ne, Sadusi una ne, lotu numb kerman eine iwa kerman ta moi ge, porapora wo, 2 ellne kumbso iwa soka awi. Jisas aglo er wo gun pi mal embe, una aglo er wo gun pine we dje kandja embe dje mopillka, ga woi ge ke pille 3 iwa soka abi. Amblo kot ye aumbon dje pi ba, emill pa pora dji, ga kane soka ipo kaye numb woro embe dji, kumaike kana nono kot yembon we dji. 4 Kambono wo embe yei ba iwa soka kandja dje una aupill al ge una merke Jisas boll pillgi dji. Una pillgi dji una er pakna wo molmaka 5 tausen (5,000) mal embe moi.

5 Kam kumaike kana, Juda una kerman kambono ne, ngambalne pai una ne, God lo beke awi una yemaka, kambono wo Jerusalem makai to moi. 6 Ga moi ge ta opa gale awi iwa kerman Anas ne, yene eplye iwa Kayapas, Jon, Aleksander ne, ga epilne pende boll aike wo moi. 7 Kambono embe molmaka, Pita ne Jon dje i pakna wormaka, iwa kerman kambono kandja dje soka awo embe dji, iwa kake ke ye pai ge ye soka yembene dongall ge namba mal paika ye i gun worpill? Una ne mal kandjiye al yenmell ne? dji.

8 Djimaka God Murble Pita boll moika Pita embe dji, iwa kerman kambono ne, ngambalne pai una, ye 9 no kot ye awinj ge me embe mal paro. Iwa ta kake ke ye pai ge no ye wopake ye aupillka une alla er wo gun pi al ge, ye me ge pille no kot ye awinj. 10 Ye embe yenj ge pille, ye iwa kerman kambono mor ne, Israel una porapora ye mor ge ipon na kandja dje ye aundo ge pillme! Iwa kake ke ye pai alla kiwa molo ye nalene al agle molo embe yendo ge, Jisas Krais dumo Nasaret iwa kandjiye al une kiwa moro. Ye ipo iko pera al nil to goi iwa ge, God ye worika une aglo er wo gun pi iwa ge, une kandjiye al iwa ge kiwa moi. 11 Baibel al kandja dje pepa bolo pagi mal ge, une pille boi,

Ye numb takbon dje yei al ku taimanta pai ge ke moi pille keri.
Ba alla ku ge wopake uro kaima pai una ipo numb dongall taki we dji. ^{▼▼Song 118.22}

12 Jisas kandjiye taimane al ge God una i yem woro natonda. Makimb al una kuruwo kama kandjine merke paro ba, Jisas kandjiye al nono i yem woro natonda we dji.

13 Pita kandja embe djika, iwa kerman kambono kani, soka pepa mon ta nakanpill, una kiwa mopill, ba soka kandja dongall djipill pille kambono aya dje iwa soka Jisas boll aike wani una we dje kani. 14 Ga kandja ta djimbon dje kani ba, asa iwa kake ke moi una ge Pita ne Jems boll aike molmaka, ga kane kandja ta djine napai. 15 Embe pai pille, ga kambono dje bekle woro pagle yenekne molo embe dji, 16 Iwa soka ge namba yembon? Soka kogo dongall ta mal yepill ge Jerusalem una pille kane yenj. Soka embe nayepill we djimbon ge kune nayenda. 17 Ba alla wal yei mal ge una kandja dje wai dje djine dje pille iwa soka mopell al kandja dongall dje awo embe djimbon, Jisas kandjiye ge ye po una dje naumbell we djimbon we dji. 18 Dje kere pagle, ye er numog wose dji. Wo mopillka, ga embe dji, ye Jisas kandjiye ge dje una nause dje man dji.

19 Embe djimaka, Pita ne Jon embe djipill, God nale al wopake yembon mo nayembon ge, ye djine. No ye kandja djinj mal yembon mo God kandja djindo mal yembon? Ye namba we dje pir? 20 No wal pille kane yepill mal ge kandja nadjimboll ge kune nayenda.

21 Djipillka iwa kerman kambono kandja dongall dje awo embe dji, ye embe yenmell ge alla nayese! dji. Embe dje kere, soka dje orko wormaka er pupill. Soka kogo dongall yepill mal ge una porapora kani, God kandjiye amblo pla wori pille, iwa kerman kambono tambon dje kani ba wal me ta napai. 22 Asa kake ke yei iwa moi ge kognumb 4-pela ten (40) mal embe moi.

Una yembene dongall i Jisas kandjiye djimbon dje pille kamang yei

23 Soka dje orko wormaka, yenekne unakne moi al po, opa gale awi una kerman ne, ngambalne pai una porapora yei mal ge, dje aupill. 24 Djipillka una nomane taimane paika God pille kamang ye embe dji, Iwa Kerman, ni kupill makimb ne, nu solwara ne, wal porapora moro ge ni nenem ye yen iwa moren. 25 Ni Murblen moro ge une djika ni boin una Depit ge pille embe dji,

Namba yei pille una epill djell una God boll ellne kumbso awinj?
Alla namba yei pille una kandja begle God boll kunda yembon dje yenj ge kiwa mal yenj?
26 Makimb al una king kambono ne, iwa kerman kambono porapora wo
Iwa Kerman boll kunda bopon dje yei.
Alla Iwa Kerman dje wori Krais ge ga une para aike tambon dje yei ^{▼▼Song 2.1,2} we dje Depit pepa embe boi.

27 Depit pepa boi mal ge Erot ne, Pontius Pailat ne, Israel una ne, epil djell una porapora wo dumo ge makai to molo, ni boin iwa wopake moi dje worin iwa Jisas tambon dje kandja begle pi. 28 Ga kandja embe dje begle pi ge ni nomanin pai mal pille, ni yemben al wal are ta yenda dje pille yen mal ge kambono wo embe yei. 29 Iwa Kerman, ga no tambon dje yenj ge ni kanden. Ni yemben dongall no aumbenka, no ni boin una mormon ge, kand nagolo, ni kandjin dume dje, dje una aumbon. 30 Jisas ni boin iwa wopake kandjiye al ge, ni nenem aglen al, una ke tonda i gun woro, kogo dongall ye, kogo ta mal ye embe yemben we dji.

31 Kamang embe ye kermaka, numb numog to moi al ge puga kerman djika, God Murble wo ga boll puka toika, kand nagolo God kandjiye dje pene wori.

Una agane abane pende moi ge pak to awi

32 Jisas pillgi dji una porapora nomane taimane paika, kumbene taimane yeika, yenekne wal kane noi ge kane embe dji, ge no wal eri man, una porapora walene moro we dji. 33 Aposel yembene dongall paika, Iwa Kerman Jisas golo aglo er wo gun pi mal ge, ga kandja dje pene wori. Alla, God wopake kaima ye kambono awo moi. 34 Una numbne makimbne ta yei ge ga po ku bolo iwo, aposel kakene al wori. Aposel kambono ipo una wal kane nanoi una moi al awi. Ge pille, pillgi dji una moi al una wal kane nanoi una ta namoi.

36 Iwa ta moi ge dumo Saiprus iwa yene kandjiye Josep we dji. Aposel kambono kandjiye ye Barnabas we dji. Kandjiye Barnabas me ge une kandja arngan ye dje aundo iwa. Une epilye Lipai una moi. 37 Yene makimbye ta yei ge po ku bolo iwo aposel kakene al wori.